يوم 9 سبتمبر
يا كل حر هاينزل التحرير
حقى فى رقبتك من كبير لصغير
مين انا؟؟ ماانت عارف م الضحايا كتير
أنا ام الشهيد واخته وعمته وخالته
أنا بنت الشهيد وخطيبته وأرملته
أنا أختك وجارتك .. بص م الأخر
أنا عايزه حقى من شقى بلطجى ساخر
من كوديه فاجرة حظها م الغبى وافر
ببجاحة الجهل هتفوا إحنا لمبارك
ابناء سفاح – استحى – دا البعيد عارك
هانوا كرامتى واستحلوا الضرب عالخدين
وعساكره تضحك وضباطه يقولوا آمين
وانا نارى قايده وتار ولدى اسيبه لمين
اقطع لسانه .. اللى شتم ورد فتح فى جناين مصر
اكسر دراعه اللى حدف طوبة يهد بيها النصر
اكسر له أيد مدها فوق جبين أو خصر
اكسر له رجله كسحه وعلمه أدبه
ولو عميت له عينيه يبقى ده أدبه
ده ميستهلش يشوف نيلها ولا دهبه
وعلمه إن الكرامه والشهامه فى تراب بلده
وانه بخيانته بيطفى النور ف عيون ولده
متقولش سلمية .. فهموها إنك تدير الخد للضارب
راحت عليها مع اللى طبعه الغدر فى الغالب
دا ديل الكلب ما ينعدل ولو علقوا فيه قالب
ليست هناك تعليقات:
إرسال تعليق